بھارتی طیارے کا اغوا۔۔۔۔پرویز مشرف کا پہلا امتحان
تحریر: محمد لقمان
چوبیس دسمبر انیس سو ننانوے۔۔ جمعتہ المبارک۔۔۔ گورنر ہاوس لاہور میں پاکستان کے پہلے چیف ایگزیکٹو جنرل پرویز مشرف پنجاب کے سینئر بیوروکریٹس کے ساتھ بطور سربراہ مملکت پہلی ملاقات کے لئے آئے ہوئے تھے۔ اجلاس پہ اجلاس جاری تھے۔ انہوں نے نماز جمعہ بھی گورنر ہاوس کی مسجد میں ادا کی تھی جس کی کوریج خاص طور پر سرکاری میڈیا سے کروائی گئی۔ جنرل مشرف کو بھی دیگر حکمرانوں کی طرح اقتدار میں آنے کے بعد ایک مخصوص لٹمس ٹیسٹ سے گذرنا پڑا تھا کہ کیا وہ سچے ا ور راسخ العقیدہ مسلمان ہیں یا نہیں۔ بارہ اکتوبر کو فوجی حکومت کے قیام کے ساتھ ہی ان کے مذہب کے بارے میں افواہیں عام ہو چکی تھیں۔ سرکار کو میڈیا کے ذریعہ یہ بات پھیلانا پڑی تھی کہ وہ صرف مسلمان ہی نہیں بلکہ سید زادے بھی ہیں۔ اور ان کے والد سید مشرف الدین ترکی میں پاکستانی سفارت خانے میں ملازم رہے ہیں۔ قصہ مختصر کہ ملک کے سب سے بڑے صوبے کے طاقتور بابووں کے ساتھ نئے فوجی حکمران کی ملاقات جاری تھی۔ جس میں انتظامی امور پر ہی زیادہ تر زور تھا۔ میں، اے پی پی لاہور کے چیف رپورٹر سید فواد ہاشمی اور سرکاری میڈیا کے دیگر ارکان حسب معمول اجلاس والے کمرے سے کچھ فاصلے پر باہر موجود تھے۔ شام ہونے کو آئی تو ایک دم چیف ایگزیکٹو کے پریس سیکرٹری اور ڈائریکٹر جنرل آئی ایس پی آر بریگیڈیر راشد قریشی ہم سے کچھ دور بیٹھے پی آئی ڈی کے ڈائریکٹر کے پاس آئے اور بتایا کہ جنرل صاحب اب جا رہے ہیں ۔ فواد صاحب نے پی آئی ڈی والوں سے مزید کریدا تو پتہ چلا کہ بھارت کا ایک طیارہ نیپال سے اڑان سے فوراً بعد ہی ہائی جیک ہو چکا ہے اور اغوا کار طیارے کو لاہور میں لانا چا رہے ہیں۔ جس کی وجہ سے بھارت کے ساتھ ساتھ پاکستان بھی ایک ایمرجنسی کی کیفییت میں چلا گیا ہے۔ جنرل مشرف گورنر ہاوس سے روانہ ہوئے تو ہم بھی چائنہ چوک میں واقع اے پی پی لاہور کے بیورو آفس واپس آگئے۔ ایک اور رپورٹر مسرت حسین کو لاہور ایرپورٹ پہلے ہی روانہ کیا جا چکا تھا۔ دفتر جا کر یہ بھی پتہ چلا کہ طیارہ بھارت کے دارلحکومت دہلی کی بجائے پاکستانی سرحد سے کچھ دور امرتسر کے راجہ سانسی ایرپورٹ پر اتارا گیا تھا۔ پھر وہی ہوا جس کا ڈر تھا۔ ہائی جیکرز طیارے کو لاہور ایرپورٹ پر لے آئے۔ جہاں ڈیڑھ دو گھنٹے رکنے اور ری فیولنگ کے بعد دبئی روانہ ہوگیا۔ اگر چہ وقتی طور پر پاکستان کے لئے بلا ٹل گئی تھی۔ مگر یہ بحران مزید ایک ہفتے تک جاری رہا اور اکتیس دسمبر کو قندھار کے ایرپورٹ پر بالکل طیارے کی ہائی جیکرز سے واگذاری ہو سکی۔ مگر اس طیارے کے اغوا اور اس کے نتیجے میں بھارتی جیلوں سے رہا ہونے والے افراد کی وجہ سے بھارت کو پاکستان کا بین الاقوامی سطح پر تاثر مزید خراب کرنے موقع مل گیا تھا۔ کیا طیارے کا اغوا پاکستان کے خلاف ایک سوچی سمجھی سازش کا حصہ تھا ابھی تک اس کا اندازہ نہیں ہوسکا۔ مگر اس واقعے کے بعد جنرل پرویز مشرف کی مدارس کی اصلاحات کی کوششوں کا آغاز ضرور ہو گیا تھا۔
(جاری ہے)
